X
Skip to content

Atersadenn a-bezh bet gwraet get Patrick Dréan aveit kazetenn divyezhek bro an Alre An Dasson niverenn 78 : Ar c'han e Bro-Gwened.

Penaos 'teus-te bet c'hoant da soniñ a veg, penaos ema paset ar penn kentañ ?

Un dra a-bouez a zo da lâret da gomañs : d'un tu emañ ma zad, bet ganet é Kiberenn, desavet etre Kiberenn, Paris ha kreisteiz bro Frañs ha tost e galon doh bed e dud-kozh – re Kiberenn – da lâret eo ar yezh, an endro, ar musik hag all...
Neuze èl ur bochad tud bet divroet e Paris ’oe ken tra en e benn : donet da Vreizh en-dro ha derc'hel par ma c'helle get hengoun e vro. Deskiñ ar muiañ a-ziarneañ ha deskiñ d'ar re ’rall (kar ma zad en deus kalon ur c'helennour !)

Ha d'an tu ’rall, ma mamm hag he familh : labourizion-douar a Vendon. Neuze tud hag ar vro, breton o yezh komzet bemdez, kanerion en o mesk, hag ar re ne sonent ket ’nezhe a vourre selaou doh ar r'all. Piah a zo a-bouez-bras, kar da betra derc'hel ma ne blij ket da hani ?
Neuze an « dañvez » d'un tu ha d'an all, an c'hoant , staget mat doh kalon ma zad (betak re gwezh-a-vez mes n'hellan ket en tamall re !) dougiñ tout an traoù-sen pell hag ihuel.


Setu neuze kochon Nolùen, èl ma oen bet morañvet gant ma zud, a gleve komz, soniñ, bekal (àrne'hi!), c'hoariñ, farsal, oueliñ, da lâret eo : ar vuhez, e breton. D'ar sadorn ’yen da zañsal e Landaol petramant Pleùegner, Langidig, Baod pe Gregamp lec'h ma yae ma zad da soniñ get Loeiz Ar Bras... Ha me ’gleve sonerion ( g'er beg ) ar vro, an Drouzerion, Paotred Pleùegner, Kanerion ar Bleù, aveit komz ag ar re vrudetañ, ha re ’rall c'hoazh. Eh aen d'ar pardonioù get ma mamm-gozh : Santez Anna, Sant Matelin ha dreist holl, kani Santez Margerit (e Mendon) lec'h ma rae Pépé àr-dro an tenn-boull ha Mémé ha Mamm àr-dro ar c'hafe/katiaù, e-tioh tud ar c'harter. Ha petra ’veze klevet amañ c'hoazh ? Tud é soniñ g'er beg kanennoù e-pad an overenn ha sonennoù doh taol !

Mes ne daolen ket mansion, a mod-sen ’oe dre-mañ, bourrapl e oe ha se' tout !